நான் யார் ?

கவிதைகள்

 நான் யார் ?

ஆதிக்கவெறி கொண்ட மிருகமா நீ ?
ஆச்சார வெறி கொண்ட அடிமையா நீ ?
திராவிடனா ?
ஆரியனா ?
ஒடுக்கியவனா ?
ஒடுங்கியவனா ?
எவனடா  நீ ? என்போரே ,கேளும்

மயக்கத்தின் விளிம்பில் நிற்கும்  நான்
உளறினால் கவிஞன்
கிறுக்கினால் ஓவியன்
கத்தினால் பாடகன்
பொய் சொன்னால் இலக்கியவாதி
மெய் சொன்னால் குடிகாரன்
மயக்கம் தெளிந்தால் சம்சாரி

எம் அடையாளம் யாம் அடையவிரும்புவது
நீர் அளிப்பதென்று.

குறியின்றி பிறந்திருக்கலாம் நான்

கண்ணகி தேசத்தில் ஓர் நாள்
கதிரவன் இளைப்பாரச் சென்றதால்
எங்கும் இருள் மயம்
அதிரங்கள் அதிர நடக்கின்றாள் அவள்
வழிகின்றன வியர்வை மணம்
சாலையின் குப்பை மணம்
ஆள்பவரின் ஆசியுடன்
தெருவெங்கும் சாராய மணம்
வெறிக்கின்ற இருளின் கண்கள்
அத்தனையும் கடந்தாக வேண்டும்
அரை மணித்துளியில்
உடலைக் காப்பது உடன் பிறந்த
ஓர் ஆதி உணர்வு
பெண்ணாய் பிறந்தால் அது பீதியுணர்வு
குறிகளுக்கு அஞ்சியே நகர்கின்றன அவள் நொடிகள்
தெருவின் திருப்பங்களில்
அவள் வாழ்வின் திருப்பங்கள் ஒளிந்திருக்கலாம்
பேருந்தில் உரசியவன் நாற்றம்
கழுத்தோரம் எரிகிறது
இதோ வீடு
பாதுகாப்பின் கூடு
நுழைந்ததும் வருகிறது மூச்சு
சிறுநீரின் அழுத்தலோடு
கழிக்கையில் இன்றும் தோன்றுகிறது
"கண்ணகியாம்
கற்பாம்
மயிராம்
குறியின்றி பிறந்திருக்கலாம் நான்."